19-ാം വയസിൽ ഒരു സംരംഭം തുടങ്ങി മൂന്ന് വര്‍ഷം കൊണ്ട് ബ്രാൻഡ് ആക്കി വളര്‍ത്തിയ കഥയാണ് അൻസിയയുടേത്. സംഗതി പ്രകൃത്യദത്ത സൗന്ദര്യ വര്‍ദ്ധക ഉത്പന്നങ്ങളാണ്. ഓട്ടുരുളിയിൽ കാച്ചിയ നാടൻ എണ്ണയും വീട്ടിൽ തയ്യാറാക്കുന്ന കൺമഷിയും ഫേസ്‍പാക്കും ഒക്കെ വിറ്റ് ഈ മിടുക്കി ഇപ്പോൾ പ്രതിമാസം സമ്പാദിയ്ക്കുന്നത് ലക്ഷങ്ങളാണ്
ഒരു ബിസിനസ് തുടങ്ങാനും വിജയിപ്പിയ്ക്കാനും പ്രായം ഒന്നും ഒരു തടസമല്ല. അതിനായി മെനക്കെടാനും കഠിനാധ്വാനം ചെയ്യാനും തയ്യാറാണെങ്കിൽ ലക്ഷങ്ങൾ പ്രതിമാസ വരുമാനം നേടുകയും ചെയ്യാം. പാലക്കാടു സ്വദേശിയായ അൻസിയ ഇതിന് ഒരുദാഹരണം ആണ്. അൻസിയയ്ക്ക് പ്രായം 22 വയസ് മാത്രം. കാച്ചെണ്ണയും നാടൻ കൺമഴിയും ഒക്കെ വിറ്റ് സ്വന്തമായി ഒരു ബ്രാൻഡ് തന്നെ പടുത്തുയര്‍ത്തിയിരിക്കുകയാണ് ഈ പെൺകുട്ടി.
ഉമ്മീസ് നാച്ചുറൽസ് എന്നാണ് അൻസിയയുടെ ബ്രാൻഡിൻെറ പേര്. സോഷ്യൽ മീഡിയയുടെ സഹായത്തോടെയാണ് അൻസിയ തൻെറ ബ്രാൻഡ് വിപുലപ്പെടുത്തിയത്. ഭര്‍ത്താവ് റംഷീദും എല്ലാ പിന്തുണയുമായി ഒപ്പം കൂടി. ഇപ്പോൾ ലക്ഷങ്ങളാണ് ഈ മിടുക്കിയുടെ പ്രതിമാസ വരുമാനം.
വിവാഹ ശേഷം സംരംഭം തുടങ്ങാൻ നിമിത്തമായത് രസകരമായ ഒരുകാര്യമാണ്. പ്രസവ ശേഷവും നീണ്ട് ഇടതൂര്‍ന്ന മുടിയുള്ള അൻസിയയുടെ മുടിയുടെ രഹസ്യം ആയിരുന്നു കൂട്ടുകാര്‍ക്ക് അറിയേണ്ടിയിരുന്നത്. ഉമ്മ ഉണ്ടാക്കി തന്ന എണ്ണയാണ് എന്നായിരുന്നു മറുപടി. കൂട്ടുകാരും എണ്ണ ആവശ്യപ്പെട്ടതോടെയാണ് ഇതിൽ ബിസിനസ് സാധ്യതയുണ്ടെന്ന് തോന്നിയത്. ഉമ്മയുടെ സഹായത്തോടെയാണ്സുഹൃത്തുക്കൾക്ക് എണ്ണ കാച്ചി നൽകിയത്. വരുമാനം ഉണ്ടാക്കണം എന്ന ആഗ്രഹത്തോടെ 19-ാം വയസിൽ ആയിരുന്നു പരീക്ഷണം.
ഒരു ദിവസം 5,000 രൂപയൊക്കെ ലഭിച്ചത് കൊണ്ട് കൂടുതൽ ഉത്സാഹത്തോടെ കാച്ചെണ്ണയുണ്ടാക്കി കുപ്പിയിലാക്കി ആവശ്യക്കാര്‍ക്ക് എത്തിച്ചു. കറ്റാർവാഴയും,വേപ്പിലയും, മൈലാഞ്ചിയും, ഉള്ളിയും ഒക്കെ ഓട്ടുരുളിയിൽ വിറകടുപ്പിൽ കാച്ചിയെടുത്താണ് എണ്ണ തയ്യാറാക്കുന്നത്. എണ്ണ ഹിറ്റ് ആയതോടെ സൗന്ദര്യവര്‍ദ്ധക ഉത്പന്നങ്ങളുടെ നീണ്ട ലിസ്റ്റുമായി കൂട്ടുകാരും എണ്ണ ഉപയോഗിച്ചവരും എത്തിയതോടെയാണ് വിപണിയിൽ ഇവയുടെ ഡിമാൻഡ് തിരിച്ചറിയുന്നത്.
ഇത് വാണിജ്യാടിസ്ഥാനത്തിൽ പുറത്തിറക്കാൻ സര്‍ട്ടിഫിയ്ക്കറ്റ് കോഴ്സുകളും ചെയ്തു. പിന്നീട് ഭര്‍ത്താവിൻെറ സഹായത്തോടെ ഗ്രൂപ്പുകൾ രൂപീകരിച്ച് വീട്ടിൽ ഉണ്ടാക്കുന്ന വിവിധ ഉത്പന്നങ്ങളുടെ വിവരങ്ങൾ അപ്‍ലോഡ് ചെയ്തു തുടങ്ങി. തുടക്കത്തിൽ ഓര്‍ഡര്‍ അനുസരിച്ചായിരുന്നു വിൽപ്പന എങ്കിൽ ഇപ്പോൾ ഉമ്മീസ് നാച്ചുറൽസ് വൻ ഹിറ്റാണ്. രാസവസ്തുക്കൾ ഒന്നുമില്ലാതെ തയ്യാറാക്കുന്ന പ്രകൃതിദത്ത കൺമഷിയുടെ വീഡിയോ പുറത്തിറക്കി ഒറ്റദിവസം കൊണ്ട് 75,000 രൂപയുടെ ഓര്‍ഡര്‍ ലഭിച്ചത് അൻസിയയെ പോലും അദ്‍ഭുതപ്പെടുത്തി. ഭര്‍ത്താവിൻെറ സഹായത്തോടെ കെട്ടിപ്പടുത്ത സംരംഭം കൊണ്ട് ഉമ്മയ്ക്കും ലഭിയ്ക്കുന്നുണ്ട് വരുമാനം എന്ന് അൻസിയ പറയുന്നു